യേശുദേവന് ഉയര്ത്തെഴുന്നേറ്റതിന്റെ സ്മരണ പുതുക്കി ലോകമെമ്പാടുമുള്ള ക്രൈസ്തവര് ഈസ്റ്റര് ആഘോഷിക്കുന്ന ഈ അവസരത്തില് നമുക്ക് അതിന്റെ ചരിത്രത്തിലേക്ക് ഒന്ന് കടന്നു ചെല്ലാം.
കുരിശിലേറ്റിയതിന്റെ മൂന്നാം നാള് കല്ലറയില് നിന്നും ഉയര്ത്തെഴുന്നേറ്റതിന്റെ സ്മരണ പുതുക്കിയാണ് ഉയിര്പ്പു തിരുന്നാള് ആഘോഷിക്കുന്നത്.
പ്രത്യാശയുടെ ഉത്സവമാണ് ഈസ്റ്റര്. ക്രിസ്തു ഉയര്ത്തെഴുന്നേറ്റതിന്റെ പ്രതീകാത്മകമായ അവതരണങ്ങളാണ് ദേവാലയങ്ങളില് നടക്കുന്നത്. മിക്കവാറും ദേവാലയങ്ങളില് രാവിലെ ഒന്നരയ്ക്കും മൂന്നരയ്ക്കും ഇടയിലാണ് ഉയര്ത്തെഴുന്നേല്പ് ചടങ്ങുകള് നടന്നത്.
ചരിത്രവും മിത്തും ഇഴപിരിഞ്ഞു കിടക്കുന്ന ഈസ്റ്റര്, ക്രിസ്ത്യന് - ആംഗ്ളോ - സാക്സന് - ഹീബ്രു പരമ്പര്യങ്ങളുടെ തുടര്ച്ചയാണ്. ആംഗ്ളോ - സാക്സന് ജനതയുടെ വസന്തകാല ദേവതയായ ഇയോസ്റ്ററിലാണ് ചരിത്രപണ്ഡിതര് ഈസ്റ്ററിന്റെ ആദിമ മിത്ത് കണ്ടെത്തുന്നത്.
ഏപ്രില് മാസ ദേവതയായ ഇയോസ്റ്ററാണ് തങ്ങള്ക്ക് സര്വൈശ്വര്യങ്ങളും വസന്തക്കാലവും സമ്മാനിക്കുന്നതെന്ന് ആഗ്ളോ സാക്സന് ജനത വിശ്വസിച്ചുപോരുന്നു. ക്രിസ്തുവിന്റെ ഉയര്ത്തെഴുന്നേല്പ്പു നടന്നതും ഈ വസന്തകാലത്തു തന്നെയായിരുന്നു. മതപ്രചാരണത്തിനായി അവിടെയെത്തിയ ക്രിസ്ത്യന് മിഷണറിമാര് ഈസ്റ്ററിനെ ക്രിസ്തുമതത്തിലേക്കു സ്വാഗതം ചെയ്യുകയായിരുന്നു എന്നാണ് ചരിത്രം പറയുന്നത്.
ആദ്യകാലങ്ങളില് ഇന്നത്തെപ്പോലെ ഞായറാഴ്ച്ചകളിലായിരുന്നില്ല ഈസ്റ്റര് ആഘോഷിച്ചിരുന്നത്. ക്രിസ്തുമതം സ്വീകരിച്ച റോമന് ചക്രവര്ത്തി കോണ്സ്റ്റാന്റിന് ആണത്രേ എ.ഡി. 325 ല് ഈസ്റ്റര് ആഘോഷം വസന്തകാലത്തെ പൂര്ണ്ണ ചന്ദ്രനു ശേഷം വരുന്ന ഞായറാഴ്ചയായി തീരുമാനിച്ചത്.
മത പരിവര്ത്തനത്തിനായി അവരുടെ മണ്ണില് കാലു കുത്തിയ ക്രിസ്ത്യന് മിഷനറിമാര്ക്കാകട്ടെ രൂഢമൂലമായിക്കഴിഞ്ഞ ഈ മിത്തിനെ മാമ്മോദീസാ മുക്കി ക്രിസ്തുമതത്തിലേക്ക് സ്വീകരിക്കുകയേ നിവര്ത്തിയുണ്ടായിരുന്നുള്ളൂ. ക്രിസ്തുവിന്റ്റെ പുനരുദ്ധാരണം നടന്നത് വസന്തകാലത്തായിരുന്നുവെന്നത് ഇതിനെ എളുപ്പമാക്കി.
